तुझ्यासाठी जेवायला फक्त खिचडी करेन म्हटलं..
सोबत लिंबाचं लोणचं,
एखादा पापड, बस्स !
भाजण्यापेक्षा तळावा...
किंवा मसाला चुरा
जरासं ताक ..
कढीच करते ना ...!
किंवा सिंधी कढी
आणि डाळीचे गोळे,
बस्स इतकंच!
कमी पडायला नको!
पुऱ्या कराव्यात तिखटमिठाच्या
आणि गरम खीर - गोड म्हणून..
पुऱ्यांबरोबर काय?
कोशिंबीर चालेल पटकन्
एक भरली मिरची तळते,
आणि तूप कढवावं लागेल...
नारळ कोथिंबीर लिंबू खिचडीवर...
की मसालेभातच टाकते!
एकूण एकच.... !
बघ, असं खिचडीभोवती एकेक वाढत गेलं...
माझं तुझ्यात अडकणं भिनत गेलं!