संथ वाहतो प्रवाह आता
आणिक सखोल असते काही
असे कुठे का असते तरिही
भवरे नाही तरंग नाही.
अजून नाही पाय मोकळे
अजून गुंता उकलत नाही
परंतु आता अडखळताना
ठेच जिव्हारी लागत नाही.
दहा दिशांचा किती पसारा
खुणवत नाही भुलवत नाही
जरा काहीसे नजीक जाता
निरर्थकाचे वारे वाही.
भेट तुझी पण अजून स्मरते
तरिही तितकी तगमग नाही
भेटीवाचून जन्म आपला
चुकला नाही अडला नाही.
कुठे जायचे काय न्यायचे
आदिम प्रश्नांचे वेटोळे
प्रवास केवळ शाश्वत इतके
सत्य याहुनी दुसरे नाही.