बियास नदीच्या काठावरून .....

हा संथ चढणीचा रस्ता,
लांबवरून वळणं घेणारा घाट
आपला डौलदारपणा सोडत सोडत
उंच उंच सडपातळ होत जाणाऱ्या
देवदार वृक्षांची जंगलं.
फिकं फिकं ऊन
भिनत जाणारी थंडी
निळसर दिसणाऱ्या हिमालयाच्या रांगा
खुणावणारी चकचकीत हिमशिखरे
चेरी ब्लॉसमची आठवण करून देणाऱ्या
पांढर्या गुलाबी रंगाच्या फुलांची
दुतर्फा बहरलेली सफरचंदाची झाडं
हलक्याश्या वार्यानेही भुरभुरणाऱ्या
त्यांच्या मुलायम पाकळ्या ...
आणि अगदी शेवटपर्यंत
रस्त्याच्या कडेकडेने सोबत करणारी
खळखळणारी बियास नदी.
ही नक्की तुझी आठवण आहे कि आणखी काही ?
रस्त्याच्या कडेकडेने जाणारी.....
अखंड सोबत करणारी ....
कि तीच तेवढी वाहणारी
आणि हा रस्ताच शेवटपर्यंत -
तिच्या काठाकाठावरून जाणारा !!!