सुख येते म्हणते दारी

घर सजते प्राणपणाने

पण सरता संपत नाही

हा असोस - वाट पहाणे

घर पानगळीचा मोसम

घर चैत्रपालवी मंतर

घर वळीव कोसळणारा

घर आषाढातील सर

दाराशी पायरवांचे

कुजबुजते काही भास

घर गंधित गंधित ताजे

घे उत्कंठेने श्वास

कुठल्याही ग्वाही विना

सुख हलके मागे फिरते

अन जन्मभराचे होते

ह्या फारकतीशी नाते

सुख मोहमयीशी भूल

येऊन पुन्हा फिरल्यावर

घर लख्ख लख्ख दरवेळी

मन शिळेपाक उंबर्यावर