तशी तर संपून जाते दिवाळी पण
उंबरठ्यावरच्या दिव्यांच्या डागातून
उरल्या सुरल्या रांगोळीच्या रंगांतून
कट्टयावरच्या रिकाम्या पणत्यातून
ड्रायक्लिनिंगला द्यायच्या राहिलेल्या नव्या कपड्यातून
काढून टाकावासा न वाटलेल्या आकाशकान्दिलातून
सप्रेम भेट आलेल्या न फोडलेल्या पाकिटातून
कोपऱ्यात पडलेल्या फुलाबाजीच्या पाकीटामधून
न आलेल्या मेसेजेस कॉल्समधून
राखून ठेवलेल्या
खूप दिवस डब्यात कुडमुडत राहिलेल्या
चार चिरोट्यांमधून
खूप खूप दिवस मागे उरते दिवाळी...
- विभावरी