Thursday, July 23, 2015

घनघोर दाटुनि येते अन
हलके बरसुन जाते
ती मेघ पांगला कापूस
उगाच पिंजत बसते

तो सागरतीरी येतो
अन रिक्त कोरडा जातो
ती सैरभैरसे वादळ
काठावर झेलू बघते

तो सहजच समोर येतो
अन अभिनय करून जातो.
निर्लेप असे का रुक्ष
ती विशेषणांवर अडते.

तो पूर्णत्वाची धडपड
वळणावळणांवर बघतो.
ती सामावून घेणारा
समुद्र पाहून झुरते.

तो येतो अन जाताना
दशदिशांत मिसळुन जातो.
ती मुक्त स्वैर झालेल्या
दशदिशा समेटुन घेते.

No comments:

Post a Comment