तो वृक्ष प्रवाही होता
रानाशी कुजबुजणारा
पावसात सळसळ थोडी
वाऱ्याशी कुरकुरलेला

मोहरला पान फुलांनी
घनदाट सावली धरली
पक्षांनी गजबजताना
वृक्षाने किलबिल केली

उबदार कोवळी थंडी
पानांनी ओंजळ भरली
वाहिली कृतज्ञतेने
अर्घ्यासम नदीस काही

चटक्यात उन्हाचा झाला
चमचमला चांदणरात्री
तो वादळवाऱ्यामध्ये
उन्मळून पडला नाही

तो झाला भवतालाचा
पण मनात जपून होते
त्याच्या मातीशी त्याचे
जन्माचे आदिम नाते