स्क्रीनवरून बोट फिरत असताना,
दाहक बातम्या, रखरखीत वास्तव,
भयावह क्लीप्स, त्रासदायक वक्तव्य
ह्यांच्या खाली
मधेच कुठेतरी दिसावी
शाश्वताची मुळे शोधत जाणारी
एखादी कविता
आणि आजूबाजूला फुललेली
अनेकरंगी मनमोहक फुलं....
त्यांच्या स्वर्गीय सुगंधात हरवून जावं न जावं तोच
स्क्रोल करावं आणि
पुन्हा एकदा यावं जमिनीवर...
तशी तर ही सवयीची ओढाताण,
लपाछपी आयुष्यभर
आजकाल बोटंही ताळमेळ साधतात
फिरताना मोबाइलवर...