अनंत वेळा अनंत जागी
अवचित दर्शन देउन जाशी
अनंत रुपांमध्ये भेटशी
अनंत नावे घेउन येशी

किती ठिकाणी तुला शोधिते
आणिक करते अखंड धावा
तरी नेमक्या गोंगाटातच
ऐकू येतो सुरेल पावा

किती शिंपले उचलुन घ्यावे
कधी व्हायच्या मौक्तिक माला
अथांग खनिजांमध्ये कोणता
गवसून हाती परिस यावा

नित्याने जो वेचत असता
सुवर्ण होतो एखादा कण
नकळत हातातून निसटतो
दगडांमध्ये परीसक्षण

किती वहावे अर्घ्य तुला मी
की शोधावे स्वत: स्वतःला
पंचभूतांसह मिसळून जावे
द्वैत नुरावे तीन्हीसांजेला