रात्रतळ्याच्या पाणवठ्यावर
मृगस्वप्नांचा हलका वावर
किरणशरांच्या घावानंतर
नक्षत्राने द्यावे उत्तर

नक्षत्राने द्यावे उत्तर
मुरलिरवाच्या द्वंद्वाखातर
राधा राधा खोल तळाशी
बाकी सारे पैलतीरावर

बाकी सारे पैलतीरावर
नांगरली पहाटेची नाव
चालू असते यथेच्छ ये जा
जाणीव फुलवी चांदणगाव

जाणीव फुलवी चांदणगाव
क्षणभर बसता मग काठावर
गजबज नुरते ऐलतीरावर
रात्रतळ्याच्या पाणवठ्यावर