इमारतीच्या माझ्या थोडे बाजूला
वठलेले हे झाड रोजचे दिसे मला
वेगवेगळ्या पक्षांची त्यावर ये जा
किलबिल, गलका, सूर नवनवा गाण्यांचा

पटलावरती मेघांचे घनगच्च झुले
फेनफुलांचे आभासी जणु रान फुले
उभे राहते सामोरे पण झाड असे
निष्पर्ण तरी बैराग्याला दुःख नसे

मावळतीला रविबिंबाची जादुगरी
धुरकटलेल्या माखुन फांद्या सोनसळी
कधी विलासे चंद्र शुभ्रसा संध्येला
चमचम करते चंदेरी सुकली काया

असेच आहे बहुधा मनही राखाडी
सजवित आहे उगाच मोहक रंगांनी
- विभावरी