अवकाळी पावसाने
होऊन जाते झाडाझडती
कष्टाने वाढविलेल्या रोपांची…
नुकतीच फुटलेल्या पानांची…
तग धरून नेटाने उभ्या असलेल्या
आवश्यक झुडुपांची,
वाताहत होते जोम धरत असलेल्या
नवीन नवीन धुमारयांची ….
अवकाळी पाऊस उखडून टाकतो
खोल न गेलेली मुळं…
उपटून काढतो सगळेच
निश्चयाचे नाजूक साजूक फुलोरे…
आणि विस्मरणाची मृदगंधी आवरणं……
अवकाळी पाउस शब्दशः फिरवतो सगळ्यावरच पाणी…
अवकाळी पाउस घेऊन येतो
अवकाळी निघून गेलेल्या माणसांच्या आठवणी…