Thursday, June 4, 2015

तो रिमझिम रिमझिम येतो
तनमनात श्रावण झरतो.
अदमास किती लावावे
पाऊस जीवाला छळतो.

मी चिंब चिंब होताना
तो उन्हें पांघरी भगवी.
मी रिक्त रिक्त होताना
तो इंद्रधनु सतरंगी.

मी ओथंबून जाताना
तो निर्जल एकल कान्हा.
मी निःसंगी अनुरागी
तो स्पर्शातुरसा पावा.

मी व्यक्त व्यक्त होताना
तो निर्मोही घननीळा.
मी सावरताना सारे
तो व्याकुळ काजळकाळा.

हा लपाछपीचा श्रावण
अन अदमासातील अर्थ
लपण्यातील मधु अनुबंध
कळण्यात न जावे व्यर्थ. 



जो क्षणात असतो आणिक 
क्षणात हरवून जातो 
जो निश्चित नसतो तो तो 
निश्चित जपला जातो 


तो रिमझिम रिमझिम येतो ...